Ka Selloane Khampepe
Khamphani ya Molemosa Language Services e etelletsweng pele keMme E. Matabane le Mme A. Ntlhokoa ka kopanelo le ofisi ya Provense ya Freistata ya Lekgotla la Dipuo Tsohle tsa Afrika Borwa (PanSALB) e ile ya rupella basebetsi ba Lefapha la Bodulo (DHS) ka Puo ya Matsoho ya Afrika Borwa (SASL). Thupello e ne e tshwaretswe Yunivesithi e Bohareng ya Theknoloji, mme basebetsi ba neng ba tlile thupellong ba ne ba arotswe ka dihlopha tse pedi. Ka hona, thupello e nkile dibeke tse pedi ho tloha ka la 18 – 31 Tlhakubele 2026.
Ntate Thapelo Lebona o ile a fana ka nehelano matsatsing a mabedi ha sehlopha sa pele se qala thupello le ha sehlopha sa bobedi se qala thupello. Nehelanong ya hae Ntate Lebona o buile ka thomo ya PanSALB mme a tsepamisa nehelano ya hae haholoholo tabeng ya Puo ya Matsoho. O boletse hore kaha Puo ya Matsoho e se e le e nngwe ya dipuo tse 12 tsa semmuso Afrika Borwa, PanSALB mosebetsi wa yona ke ho nnetefatsa kgodiso, ntshetsopele, tshebediso le hlompho ya Puo ya Matsoho. O hlaloseditse basebetsi ba lefapha ka bohlokwa ba ho tseba Puo ya Matsoho hore Ditholo di fumane ditshebeletso tsa lefapha ka puo ya bona. Puo ya Matsoho ke puo e neng e nyatswa ebile e hatelletswe haholo nakong ya ho feta.
Kwetliso ena e reretswe hore basebetsi ba lefapha ba tsebe ho matlafatsa ditshebeletso tseo lefapha le fanang ka tsona setjhabeng sa Ditholo. Ho bile bohlokwa hore Mme Matabane eo e leng Setholo a fane ka thupello ka bokgutshwanyane mabapi le Setso sa Ditholo, hore Puo ya Matsoho e fapane ka mokgwa ofe le dipuo tse buuwang le hore e sebediswa ka mokgwa ofe. O tobokeditse bohlokwa ba hore Puo ya Matsoho ha e a itshetleha feela ka matshwao a matsoho, empa e kopanya matsoho, mmele le sefahleho ho fetisa molaetsa.
Mme Matabane o ile a tswela pele ka ho fana ka thupello ya Puo ya Matsoho moo a ileng a ruta ditlhaku tsa alfabete le ho itsebisa. Mme, a ruta matshwao a latelang: a kakaretso a puisano, a dipotso, a amanang le mareo a bodulo, a sebaka, a amanang le dikgwedi tsa selemo le a amanang le dipalangwang.
Letsatsing la ho qetela la thupello basebetsi ba ile ba hlahlojwa ka ho re ba romelle Mme Ntlhokoa dividiyo tsa bona ho latela sehlooho se fanweng. Ba ile ba lokela le hore ba itokisetse ho ngola hlahlobo. Hlahlobo e ne e akaretsa tsohle tseo basebetsi ba ithutileng tsona. Thupello e ile ya tsamaya hantle haholo mme basebetsi ba bontshitse thahasello ya ho ithuta le ho tseba puo ena. Ba ile ba hlalosa le hore ba ka thabela hore nako e tlang ba ithute Puo ya Matsoho ya boemo bo hatetseng pele.
Basebetsi ba ile ba abelwa ditifikeiti tsa ho phethela thupello ka la 13 Motsheanong 2026. Ba ne ba itumetse haholo ha ba fumana ditifikeiti ebile ba le motlotlo hore ba ithutile puo eo ba neng ba sa e tsebe mme ba boletse hore ba ithutile tse ngata.
Ka Selloane Khampepe
