Ka Selloane Khampepe
Lefapha la Disaense tsa Dikgokahano la CUT le thehileBoto ya Boeletsi mmeLekgotla la Dipuo Tsohle tsa Afrika Borwa (PanSALB) Freistata le kgethuwe ho ba setho sa Boto ya Boeletsi ya Lefapha la Disaense tsa Dikgokahano. Ditho tse ding tse kgethuweng ho ba le seabo Botong ya Boeletsi ke kemedi ya Lesedi FM, Ditaba tsa SABC, Lekgotla la Ketsamelao, Lefapha la Toka le Ntshetsopele ya Molaotheo (karolo ya ditshebeletso tsa puo) le ba Ditaba tsa OFM hara ba bang. Maikemisetso a Boto ena ya Boeletsi ke hore e eletse Lefapha la Disaense tsa Dikgokahano la CUT ka dithuto tsa lefapha tsa yunivesithi le ho thusa ho sekaseka haeba tse rutwang di molemong wa baithuti ba yunivesithi mme di amana le se etsahalang indastering hore baithuti ba thusahale ho fumana mosebetsi.
Bahlophisi ba CUT ba tsamaisitseng dikopano tsa Boto ya Boeletsi ka boqhetseke le ba entseng dinehelano ke Hlooho ya Lefapha la Disaense tsa Dikgokahano, Ntate Papi Lemeko mmoho le Ngaka Mardi Delport, Ngaka Brenton Fredericks, Ntate Mojalefa Koai le Mme Amanda Timbe.
Taba e amang baithuti haholo e hlahisitsweng ke CUT e lokelang ho batlisiswa ke hore ebe ngwana e mong le e mong o lokela ho kena yunivesithi, le bohlokwa ba ho tsepamisa maikutlo ho ruta ka dikgwebo dithutong tsa yunivesithi ka maikemisetso a ho fokotsa taba ya hore batho ba dule ba batla mosebetsi empa ba ithehele ona. Ho ile ha hlaka nakong ya dipuisano hore se rutwang yunivesithi le se etsahalang mosebetsing ha di nyalane hantle. Sena se tshwanetse ho lokiswa hobane baithuti ha ba qeta dithuto tsa bona yunivesithi, ba hloleha ho etsa mosebetsi empa ba na le mangolo a sa ba thuseng ho etsa mosebetsi.
Diqholotso tse ding ke hore barupelli ba bang diyunivesithi ba ruta boqolotsi ba ditaba empa bona ka bobona ho se na mohlang ba ileng ba kena ofising ya ditaba ebile ba sa utlwisise ditebello tsa mosebetsi le dinako tse petetsaneng tseo mosebetsi o lokelang ho etswa ka ona. Baithuti ba bang ha ba qete dithuto tsa bona tsa puo ka nako e lebelletsweng. Ba kgetha dithuto tsa puo ka mora hore ba hlolehe ke dithuto tse ding tseo ba neng ba di kgethile mme ditlamorao e ba hore ba sokola ho ngola ka puo ya lapeng le English. Ba bang ba sokola ho etsa diphetolelo tsa Sesotho ha ba lokela ho sebetsa seyalemoyeng se kang Lesedi FM hobane ba etsa diphetolelo tse tobileng ba sa shebe moelelo. Bothata ba ho bala Afrika Borwa le bona ke tshita e kgolo hobane baithuti ha ba utlwisise seo ba se balang hore ba tle ba kgone ho etsa phetolelo e nepahetseng. Ba bang ba baithuti ha ba ingolle mosebetsi wa bona mme ba sebedisa Bohlale ba Maiketsetso (AI) eka ke mosebetsi wa bona.
Boto ya Boeletsi e lokela ho sebedisana le CUT ho thusa ka diphephetso tsena tse boletsweng. Kaha CUT e ikemiseditse ho thusa baithuti, ho na le lenaneo la dibeke tse tsheletseng la baithuti moo baithuti ba fuwang monyetla wa hore pele ba phethela dithuto tsa bona, ba ye dibakeng tse kang PanSALB, Lesedi FM, Lekgotla la Ketsamolao, jj. ho lo bona le ho ithuta hore mosebetsi o etswa ka mokgwa ofe.
Dikeletso tseo Boto e shebisaneng le Lefapha ka tsona ke hore mohlomong ho ka ba molemo ha dithuto tsa puo di ka ikemela mme di se ke tsa kopana le tsa media. Ya bobedi keletso ke hore CUT e leke ho fana ka dithuto tsa botoloki mme baithuti ba tsebe dipuo tse tharo kapa ngata, e seng tse pedi feela hobane Lefapha la Toka le Ntshetsopele ya Molaotheo le hira ditokolo tse tsebang dipuo tse tharo ho toloka makgotleng a dinyewe. Ntlha ya boraro ke hore ho be le dithuto tsa mareo, leksikhografi le tsa ho ithuta ho etsa diphetolelo ka metjhini kapa theknoloji tse tla thusa hore baithuti ba hirwe Lekgotleng la Ketsamelao. Ho dumellanwe ka hore baithuti ba tla lokela ho tataiswa le ke batho ba seng ba ntse ba sebetsa ho tataisa baithuti le ho hlaola diphoso tsa ho etsa diphetolelo tse tobileng e leng se tla ba thusa ho hirwa Lesedi FM. Batataisi bana ba tla mengwa ho bua le baithuti.
Lefapha la Disaense tsa Dikgokahano le ikemiseditse ho thusa baithuti hore ba atlehe setjhabeng ha ba se ba phethetse dithuto tsa bona mme ka dikamano tsa lona le setjhaba, le se le bile le thusa sekolong sa Bartimea sa Difofu le Ditholo ka ditlhoko tsa bona le ho fa barutwana ba difofu dibuka tse ngotsweng ka Braille. Baithuti ba difofu ba kenang CUT le bona ba tla thuswa hore ditokomane tse ba tataisang di fumanehe ka Braille. Ho se ho bile ho na le batihuti ba babedi ba tataisitsweng ho ngola dithuto tsa bona ka Sesotho. Moo dithuto di ntse di ngolwa ka English feela, ho tla etswa merero ya hore baithuti ba kgone ho ngola le ka dipuo tse ding.
Boto ena ya Botataisi e tla tswela baithuti molemo haholo mme ho tla etswa hore tsohle tse reruweng ho thusa baithuti di fihlellwe ka nako e beuweng mme ho be ho ba le ditlaleho tsa selemo.
