Matlhatsi Kutu
Moletlo wa lehono wa Letšatši la Boditšhabatšhaba la phetolelo o re gopoditše ka maatla a polelo ge go etla go boitsebišo, seriti le temokrasi ka Afrika Borwa. UNISA e butše letšatši le ka go tiišetša boikgafo bja yona bjo bo tiilego go dipolelontši, ditshepedišo tša tsebo ya setlogo, le mešomo ya bona ya go akaretša, go sepela ka setu le dikolo tša ba Polelo ya Diatla, diphadišano tša go peleta le go tsebagatša dipuku nakong ya kgwedi ya Bohwa. Mohlankedimogololo wa PanSALB , Mna Lance Schultz, o gateletše mošomo wa bona wa go šireletša le go tšwetšapele dipolelo ka moka tša Afrika Borwa, kudukudu tšeo di beilwego ka thoko gomme a hlohleletša le go tiišetša boikgafo bja PanSALB go dipolelo tša setlogo ge go lebeletšwe le tšhomišo ya tšona yeo e fokotšegilego. Kgoro ya Dipapadi, Bokgabo, Setšo le Boithabišo ya Gauteng, yeo e emetšwego ke Mna Nditsheni Thoka, e gateletše gore tirišo ya polelo e mabapi le phihlelelo, seriti le maatlafatšo, e hlaloša phetolelo le botoloki bjalo ka mokgwa wa temokrasi yeo e tšeago karolo go kgodišo ya ekonomi ya leago, gomme ya tiišetša boitlamo bja yona go phetogo ya motheo le mpshafatšo ka go tlhabollo ya polelo.
Polelo ya Mdi Nomava Tunzelana e be e le segopotšo se se tšwago pelong sa mapheko ao a sa dutšego a lebane le setšhaba sa Polelo ya Diatla, tlhaelelo ya bafetoledi dikolong, ditirelong tša maphelo le dikgorotshekong. Gape o dirile kgopelo go mmušo go thekga phihlelelo ya Polelo ya Diatla go diyunibesithi le mafapheng ao e sego a mmušo gore e sebe leleme leo le tlogelwago morago. Go tlaleletša se, Tirelo ya Dipolelo ya Bosetšhaba e gateletše bohlokwa bja maemo a boleng ka phetolelong. REAH e gateletše dibaka le dikotsi tša Phetolelo ya Bone ya Diintaseteri ya Polelo ya Diatla ya Afrika Borwa (SASL) le phihlelelo ya ditšithale. Kgoro ya Toka e gateletše bohlokwa ba goba le ditsebi tša bafetoledi dikgorotshekong ka ge se ele toka ya leago, gomme PanSALB e re gopoditše ka ga tokelo ya molaotheo ya polelo le ditlamorago tša go se obamele melao ya tšhomišo ya dipolelo tša Afrika Borwa.
Ge go tswalelwa, thekgo go tšwa go VUT le Wits e tiišeditše tema yeo e kgathwago ke PanSALB go tšwetšeng pele dipolelo tša setlogo, dinyakišišo le go netefatša ditsebi tša polelo. Ka kakaretšo, letšatši la lehono e be e se fela la go keteka eupša gape e be ele la go nyaka go tšea magato; go matlafatša dipolelontši, go netefatša go akaretšwa ga setšhaba sa Polelo ya Diatla le go amogela thekenolotši mo dipolelong.
