Mongwadi: Ms Kgwadi DC
Bekeng ya 24-27 Dibatsela 2025, Setheo sa Setšhaba sa Maleme sa Sesotho sa Leboa (SSLNLB) se katane le go netefatša mananeotlotlontšu ya Taolo ya Bokgabo le Fisikise go tšwa Vaal University of Technology (VUT). Netefetšo ye e swaretšwe Polokwane, hoteleng ya Park Inn. Kopano yeo e be tsenetšwe ke ditsibi tša Taolo ya okgabo Ms Mokoena le Ms Radebe gape le setsibi sa Fisikise Mna Nemalili go tšwa go la VUT. Bona ba be ba sepela le yoo a bego a thuša ka peakanyo ya kopano ye Mna Molatou.
PanSALB ka Limpopo e be e emetše ke molaodimogolo ka phorofentsheng ya Limpopo Ms Madiba a farafarilwe ke mošomimogolo wa tša maleme wa Sesotho sa Leboa Ms Kgwadi le moithuti wa mošomo Mna Mamphoke. Maloko a komiti ya Tlhamomantšu, tlhamo ya pukuntšu le maemotekanyetšo a polelo ke bona ba bego ba letša mogoma go netefatša gore mananeotlotlontšu ao a netefatšwa ka bokgwari le botswerere.
Ka ge ditokomane di be di sena le mareo fela, Mna Mphahlele bjalo ka morulaganyimogolo o ile a tla le bašomi ba Yuniti ya Tlhamopukuntšu ya Bosetšhaba ya Sesotho sa Leboa go tla go netefatša mareo le ditlhalošo. Se e be ele mokgwa wa go kgonthišiša gore ditokomane tšeo di fiwa šedi yeo e nyakegago gore manenotlotlontšu ao a be maemong a maleba a go sepelelana le morero wa PanSALB wa go tšwetšapele le go godiša maleme a semmušo ka Afrika Borwa. Maloko a netefaditše gore mananeotlotlontšu a ngwadilwe go ya ka mongwalo le mopeleto wa maleba go ya le ka maemotekanyetšo a leleme la Sesotho sa Leboa.
Sa go roba pelo ke gore, mošomi wa tša maleme Mna Kwetepe Matlakala yoo a bego a šoma go VUT o ile a a robala boroko bjo bogolo pele a ka tsenela kopano ye ya go netefatša mananeotlotlontšu. Pele kopano e ka thoma modulosetulo wa Sesotho sa Leboa NLB, Ngk Tembane o ile a kgopela batlakopanong ka moka go tšea motsotswana wa setu bjalo ka sešupo sa go laetša tlhompho go Mna Matlakala. Mna Matlakala o ile a thuša kudu nakong ya go beakanya kopano ye. A moya wa Mna Matlakala o robale ka khutšo.
