Ka Dimakatso Charity Kgwadi
Morena Surprise Mamphoke o bile magareng ga ba bangwe bao ba aperego kobo ya thuto. Le yena o sepetše godimo ga sefala bjalo ka sealoga sa Yunibesithi ya Limpopo ge a be a fiwa lengwalo la gagwe la morago ga Dithuto la Saentshe ya Dikgokagano (Postgraduate in Communication). Yena o be a apara lepanta godimo ga lepanta la gagwe la Patšhela ya Bokgabo ya Maleme (Bachelor of Art- Languages). Thuto ga se senotlelo sa bokamoso bja go phadima fela eupša e phšiatlaganya le tshokolo ya thuba le bodiidi.
Morena Mamphoke o šoma bjalo ka moithutelamošomo wa Sesotho sa Leboa. Monna yo o kgonne go tsena sekolo ka go le lengwe a tšweletša mošomo wa gagwe ka bokgwari le botswerere. Ka nnete ke kudumela moepa thutse ga go lehumo le le tšwago kgauswi. Ga go se se palago ge motho a ikgafela go seo a se nyakago le go šoma ka maatla. Se re se bona ge Morena Mamphoke a kgona go emiša menwana ya gagwe a re #Thutopelepele. Ge o ka lebelela mararankodi a enthanete mo bekeng ye, o tla bona gore tša Morena Mamphoke di ruthofaditšwe ka kobo ye ntsho ya thuto.
Ge a hlaloša leeto la gagwe la thuto o le hlaloša ka leo le bego le se bonolo, ka ge a be a itima boroko le tša boithabišo. O laetša gore nako ye nngwe o be a eba le kgatelelo ya monagano ka ge a be a hloka mašeleng a go lefela dithuto tša ga gagwe. Yena o re se ga se sa mošitiša go tšweletša toro ya gagwe ya go hwetša lengwalo la gagwe.
Ditoro tša monna yo ke tšeo di hlokago mmagomo, o re yena a ka rata go ipona a šomela PanSALB bjalo ka molaodiphethiši. O re PanSALB e mmutše maahlo ka dilo tše ntši tša go sepelelana le maleme. Morena Mamphoke o belegetšwe le golela Sabie,Mpumalanga moo a thomilego go ba le lerato la tša malema gona. Mahlatse le mahlogonolo go morena Mamphoke, o šomile Mokone.
