Maropeng Malema
Go ba gona khoneferentsheng ya phetošo ya Molao wa UOLA e bile maitemogelo a thuto le a go hlohleletša. Khoneferentshe e kopantše ditsebi, dirutegi, bahlami ba melaotshepetšo, ditsebi tša polelo le bakgathatema bao ba nago le phišagalelo mabapi le tšwetšopele ya polelo, phethagatšo ya molaotshepetšo le phetogo ya molao ka Aforika Borwa. Bjalo ka motho yo a nago le maitemogelo ka dithuto tša phetolelo le thutamaleme, tiragalo ye e mphile tsebo ye bohlokwa ka ga ditlamorago tše di šomago tša molao wa maleme le tema ya malementši ka gare ga dihlongwa tša setšhaba.
Khoneferentshe e be e na le dikgato tše pedi, moo e diregilego matšatši a mabedi Mopitlo 2026 gomme ya tšwela pele go ba matšatši a mararo . Go tloga mathomong a khoneferentshe, go be go rena moya wa go bontšha bokgoni bja sephorofešenale, tirišanommogo, le go ditherišano tša . Ditlhagišo le dipoledišano di be di lebeletše kudu bohlokwa bja phetošo ya Molao wa UOLA, kudukudu khuetšo ya wona go tšwetša pele go fapafapana ga maleme, go maatlafatša ditokelo tša maleme, le go kaonafatša kgokagano ka gare ga dihlongwa tša mmušo le setšhaba ka kakaretšo.
Diboledi tše di hlomphegago di file go kgomarela ka temogo le ditlhagišo tša tšwetšopele, go tšwa go baetapele ba ka go latelana, go swana le Mna Julius Dantile yo e lego Mohlankedimogolophethiši wa Mošomo wa Pan South African Language Board yo a filego polelo ka ga ditebelelo tša kobamelo, gore dikgoro tša mmušo wa bosetšhaba, ditheo, le dikgwebo di swanetše go obamela molao wa UOLA ka ge e le katoloso ya molaotheo. Go feta fao, o gateletše gore peoleihlo ya kobamelo e swanetše go etiša pele go laola molaotheo le go tšwetša pele go bolela maleme a mantši. Seboledi se sengwe sa ka pela e bile Ngaka Mpumi Mabula go tšwa go Kgoro ya Bosetšhaba ya Thuto ya Motheo yo a gateletšego ka tlhabollong ya polelo le ka fao e thomago ka bana, bohlokwa bja thuto ye e theilwego godimo ga polelo ya letswele go bana, le ka fao e tlago laola tsela ya ka fao ba golago ka gona. O ile a bolela gape ka tiišetšo ya maleme a mantši le ka fao go buša ga Seburu le Seisemane go amilego tšwelopele yeo. Diboledi di bontšhitše kwešišo ye e tseneletšego ya ditlhohlo tšeo di lebanego le phethagatšo ya polelo gomme tša laetša bohlokwa bja melawana ya polelo yeo e akaretšago bohle.
Khonferentshe e file gape sebaka sa go dira dikgokagano le go boledišana le ditsebika ge e be e na le dithulaganyo tša go arogana go ahlaahla phetošo ya Molao wa UOLA go tšwa mafapheng a go fapafapana. Go dirišana le ditsebi tša pholisi ya polelo, phetolelo, go hlatholla, le ditshepetšo tša go dira melao go nkgontšha go katološa pono ya ka le go hwetša tsebo ye e šomago ka ga phethagatšo ya melawana ya polelo maemong a go fapana.
Sebopego se sengwe se bohlokwa seo ke se hweditšego go tšwa khoneferentsheng ye e bile bohlokwa bja tirišano magareng ga mafapha a mmušo, bašomi ba polelo, dihlongwa tša thuto, le ditheo tša setšhaba. Dipoledišano di bontšhitše gore phethagatšo ye e atlegilego ya phetošo ya Molao wa UOLA e nyaka ditherišano tše di tšwelago pele, thušo ya ditšhelete ye e lekanego, tlhokomelo ye e šomago gabotse, le boikgafo go tšwa go bakgathatema ka moka bao ba amegago.
Ka kakaretšo, go tsenela Khoneferentshe ya Molao wa Phetošo ya UOLA e bile phihlelo ye e putsago le ye e sa lebalegego bobedi, bjalo ka mošomi le moithuti wa thuto. Khoneferentshe ga se ya godiša fela tsebo ya ka ya molao wa maleme le phethagatšo ya pholisi, eupša gape e ntutueditše go tšwela pele go bolela maleme a mantši, tekatekano ya maleme, le mekgwa ya kgokagano ye e akaretšago bohle.
