Kantoro ya PanSALB ya porofense ya Gauteng ka tirisano le mmasepala wa Mogale City le Lefapha la Metshameko, Botaki, Setso le Boitapoloso la porofense ya Gauteng; di ne tsa keteka moletlo go rotloetsa Ditshwanelo tsa Botho tsa Puo ka la 6 Tlhakole 2026. Moletlo ono e ne e le karolo ya letsholo le le tswelelang, le le ikaeletseng go lemosa batho ka botlhokwa jwa go sireletsa ditshwanelo tsa batho tsa go dirisa dipuo tsa bone fa ba tlamelwa ka ditirelo le go tsaya karolo ka botlalo mo setšhabeng.
Moletlo ono o ne o tsenetswe ke badiredi ba mmasepala, baagi, le banaleseabe ba botlhokwa ba ba ineetseng go rotloetsa ditshwanelo tsa puo le go akaretsa batho botlhe. Gareng ga bone, go ne go le baemedi go tswa kwa ditheong tse di farologaneng go akaretsa Khomišene ya Ditshwanelo tsa Botho ya Aforikaborwa ya Gauteng, Khomišene ya Tekatekano ya Bong ya Gauteng, Khomišene e e Ikemetseng ya Ditlhopho ya Gauteng, Khomišene ya Ditshwanelo tsa Setso, Bodumedi le Puo mmogo le Kantoro ya Gauteng ya Mosireletsi wa Setšhaba, mekgatlho ya tlhabololo ya tiro le ditheo tse dingwe tse di dirang go tsweletsa tlhabololo le tshireletso ya puo.
Banaleseabe ba ba farologaneng ba ne ba dirisa tšhono eno go ruta baagi ka botlhokwa jwa go tlhaloganya le go diragatsa ditshwanelo tsa bone tsa puo. Dibui di ne tsa gatelela gore puo ga se sediriswa sa tlhaeletsano fela, mme gape ke karolo e e botlhokwa ya boitshupo jwa setso le boswa. sago ne ga nna le phanele ya dipuisano ka ga seabe se se botlhokwa se puo e nang le sone mo go rotloetseng seriti, tekatekano, le tlhaeletsano e e nonofileng mo baaging; go netefatsa gore baagi ba kgona go fitlhelela tshedimosetso le ditirelo ka dipuo tse ba di tlhaloganyang go matlafatsa go tsaya karolo le go godisa maikutlo a go nna karolo ya baagi.
Jaaka baagi ba Afrorikaborwa ba gopola Letsatsi la Ditshwanelo tsa Botho mo kgweding eno, tiragalo e e re gakolola gore lentswe lengwe le lengwe le botlhokwa. Ke segopotso se se botlhokwa sa maitlamo a naga ya rona a go sireletsa le go rotloetsa ditshwanelo tsa batho botlhe. Go rotloetsa tlotlo ya dipuo tsotlhe ke kgato e e botlhokwa ya go aga setšhaba se se akaretsang le se se kitlaneng.
Ka go keteka dipuo tsa rona, re tlotla botho jwa rona jo re bo abelanang mmogo le mekgwa ya temokerasi e e re kopanyang jaaka setšhaba.
