Ka la 28 Phato 2025 re ile ra kopana le Motheo wa Neema go keteka Setšhaba sa Polelo ya Diatla le go godiša temogo ya baboledi ba Polelo ya Diatla. Motheo wa Neema, ke mokgatlo wa go se dire letseno wo o hlomilwego ka 2017; go matlafatša le go hlola temogo ka ga batho ba Polelo ya Diatla le bao ba sa kwego gabotse, kudukudu basadi, bafsa le bana ka gare ga Ditšhaba tša baboledi ba Diatla.
Seboledi sa mathomo e be e le Mohumagadi Riah Phiyega, modulasetulo wa Motheo wa Safer South Africa. O ile a bolela ka mokgwa wo mekgatlo ye ya Neema le Safer South Africa e ketekago mengwaga ye senyane ya tirišano le tšhomišano. Mohumagadi Phiyega, o ile a gatelela dikabelo tše bohlokwa tša mohu Mohumagadi Judith Madi go setšhaba sa Polelo ya Diatla. Go tlaleletša, o boletše ka bohlokwa ba go šomišana le Setšhaba sa Diatla.
Motlatšatona wa basadi, bafsa le batho ba go phela ka bogolofadi, Mmapaseke Steve Letsike, o thomile polelo ya gagwe ka go leboga mosepedišamodiro, boto, le modulasetulo wa Motheo wa Neema Fatima Cele, ka mošomo wa bona wo o ineetšego wo o holago Setšhaba sa Polelo ya Diatla. Motlatšatona Letsike o katološitše gape ditebogo tša gagwe go Panka ya Afrika ka thekgo ya bona le tirišano le Motheo wa Neema. Godimo ga fao, o lebogile bathekgi ba bangwe ka baka la meneelo ya bona go lemošeng ka Setšhaba sa Polelo ya Diatla. O ile a bolela gape le ka fao Motheo wa Neema o tšereng kgato ye bohlokwa ya go rarolla dikgaruru tša bong (GBV) ka ditšhabeng tša Polelo ya Diatla ka dithuto tša yona le maitapišo. Dithulaganyo tše di fa sebaka se se bolokegilego le se se fihlelelwago go batho ba Polelo ya Diatla go ahlaahla maitemogelo a bona le dipelaelo, le go fa ditsenogare tše di šomago le thekgo. Ka go tšwetša pele temogo le kwešišo ya GBV, Motheo wa Neema o thuša go matlafatša batho ba Polelo ya Diatla le go hlola tikologo yeo e thekgago kudu le yeo e akaretšago bohle.
Lefapha la PanSALB le be le emetšwe ke Mohumagadi Matlhatsi Kutu le Mohumagadi Lindiwe Cindi. Mohumagadi Kutu, o ile a dira polelo legatong la Dr Sally Maepa, Molaodi wa Profense. Polelo yeo e be e gatelela boikgafo bja PanSALB go tšwetšeng pele Polelo ya Diatla ya Afrika Borwa (SASL) bjalo ka polelo ya semmušo. Dintlha tše bohlokwa tsa go tšwa polelong ke tše di latelago; go swara SASL Indaba le diwekešopo tša bafetoledi, gongwala le go lwela Molao wa SASL, go hlama koša ya Setšhaba sa Afrika Borwa ka SASL, go kgonthiša Pukuntšu ya NID ya SASL, go hloma yuniti ya bosetšhaba ya SASL ya Thutatheto, go swara diwekešopo le dingangišano tša SASL, go thekga dikolo tša Polelo ya Diatla, le go šireletša ditokelo tša badudi ba Polelo ya Diatla. Molelwana wo “Ga go na Ditokelo tša Batho ka Ntle le Ditokelo tša Polelo ya Diatla” o gatelela bohlokwa bja go lemoga le go matlafatša SASL go tekatekano le thuto.
Mohumagadi Lerato o abelane ka kanegelo ye e kgomago maikutlo ka ga maitemogelo a gagwe ka Polelo ya Diatla. Yena ga se a belegwa ka Polelo ya Diatla, o ile a lahlegelwa ke go kwa ge a le yo monyenyane kudu ka lebaka la tshwaetšo ya tsebe. Kanegelo ya gagwe e tsenelela ka fao a ilego a swanela ke go fetola lephelo la gagwe, ditlhohlo tšeo a lebanego le tšona, le khuetšo go dikamano tša gagwe le baratiwa ba gagwe.
Modulasetulo wa khamphani ya E-Deaf o ile a fa mabaka a gore ke ka lebaka la eng a thomile khamphani yeo e thušago batho ba Polelo ya Diatla gore ba kgone go ikwa ba akaretšegile go swana le batho ba go kgona go kwa.
Mošomi wa Panka ya Afrika, Elizabeth Ramashala, o ile a hlathola mabaka a bona a go kgetha go šomišana le Motheo wa Neema gore ba kgone go thuša batho ba Polelo ya Diatla.
Maikemišetšo a tiragalo ye e be e le go godiša temogo ya gore polelo le poledišano ga se tokelo eupša ke tokelo ya motheo. E ile ya gatelela gore Polelo ya Diatla ke leleme la bo 12 la semmušo gomme e swanelwa ke go dirišwa go swana le leleme le lengwe le le lengwe la semmušo.
Ka go gatelela dintlha tše, tiragalo e be e lebišitše go tšwetša pele, go akaretša le tekatekano ka go šomiša polelo, go netefatša gore Polelo ya Diatla e a hlomphwa ebile e šomišwa ka tshwanelo ka nageng.
Ka Matlhatsi Kutu
