BOGADI JWA NGWANA

Ka: KAKA Mokakale

ITLHABE BOTLHALE

MATSENO

• Re tlile go lebelela BOGADI, mme re totile mofuta o o rileng wa Bogadi.

• Bogadi ke kgolaganyo fa gare ga BATSADI ba Mosimane le Mosetsana.

• Ke thekololo ya Bana fa gare ga Monna le Mosadi.

PUISANO

Mofuta o ke tlileng go bua ka ga ONE ke mofuta wa BOGADI JWA NGWANA.

KE JO BO NTSENG JANG?

• Ke bogadi jo bo ntshediwang Ngwana Ke Monna a sa nyale Mmaagwe.

• Bo ka nna jwa ntshiwa ke Batsadi ba Monna ba bo ntshetsa Ngwana wa Ngwana wa bone.
  • A kere nako e nngwe Rraagwe Ngwana ga a tlhole a le gone mo botshelong, jaanong Batsadi ba gagwe ba re nnyaa, ga re kake ra latlha madi a rona fela.

• Bogadi jo, bo bidiwa bogadi le jone ka ntlha ya gore bo dira tiro e e dirwang ke Bogadi jo bo ntshediwang Mosadi fa a nyalwa.

• Bo rekolola seemo sa Ngwana yo a bo ntshediwang, kwa gaabo, jaaka e le ngwana yo o golelang kwa gaaboMogolo (ka fa khibeng).

• Bo ntshiwa fela jaaka Bogadi jwa Mosadi, ke gore le jone bo neelwa tlotlo e e neelwang Bogadi fa bo ntshediwa Mosadi fa a nyalwa.

• Bo tseelwa matsapa a a tshwanang le a a tseelwang Bogadi jwa Mosadi, ke gore ga bo latlhelelwe fela, bo ntshiwa ka masisi a a lekanang a Bogadi jwa Mosadi.

• Fa re leba nako e Bogadi jo bo ntshiwang ka yone, le jone bo ntshiwa mo mesong lefa e ka se nne ka makuku a Bogadi jwa Mosadi.

• Ga bo segiwe:-

• Ke gore ga bo beelwe seelo sa gore ke bokae jaaka Malome a ka baya seelo sa Bogadi jwa Mosadi, e le motlogoloowe.

• Go isiwa jone bo le bongwe fela, mme ga bo patiwe ka sepe gape se sengwe jaaka Nku ya Mokwele kgotsa ya Mathobela.
  • Mathobela: Ke nku e e ntshediwang mosadi ya o robilweng leoto pele ga bogadi/lenyalo. Ko gore ke faene.
  • Mokwele: Ke nku e e patang magadi e go ntshiwang loseka mo go yone go apeela Banyalani le Ditsala tsa bone.

MOSOLA WA BOGADI JWA NGWANA

• Maemo
  • Bogadi jo bo neela ngwana maemo a a lekanang le a Bana ba bangwe ba Rre a nang nabo kwa gaabo, e leng mo ntlung ya ga Rraagwe.
  • Fa go balwa Bana ba lelapa le, le ene o a balwa gonne maemo a mo letla gore a ka balwa le ene.
• Go dirwa
  • Ngwana yo o kgona go dirwa fela jaaka ngwana mongwe le mongwe mo lapeng, mme o tlaabe a dirwa segaaboRraagwe.
    • Dithari
      • O tlaa jelwa Dithari fela jaaka ngwana yo mongwe le yo mongwe mo lapeng.
• Sefane
  • O kgona go tsaya SEFANE sa ga Rraagwe mo lapeng gonne a tlaabe a ntsheditswe dikgomo tsa bogadi.
• Ketsaetsego
  • Bo fokotsa ketsaetsego e ngwana a ka golelang mo go yone a sa ikitse a sa itse gore ene ke mang.
  • Bo golaganya ngwana le Batsalwammogo ba gagwe, o tlaa ba itse, le bone ba mo itse mme ba itsane ka tsela eo.
  • Bo reba/fokotsa dikgothakgothano fa gare ga Batsadi ba ngwana, mme se, se dire gore ngwana a golele sentle mo lapeng.
  • Bo thusa ngwana go itshupa, ngwana o tlaa itse go itshupa sentle le gore ke mang, mme bo mo thuse ka dilo di le mmalwa jaaka;
    • Go ipoka
    • Go itlhalosa mo bathung
    • Go itse kgoro ya gaabo
    • Go se latlhege
• Fa a setse a ntsheditswe Bogadi jo Ngwana yo, o ka kgona le go fetolwa Sefane gonne jaanong o setse a wela ka mo matlhakoring a le mabedi.

• Fela ntlha ya Sefane, ke e e dumelanwang ke batsadi le masika a batsadi ka bobedi.

• Ke gore Rraagwe ngwaga ga a rutle ngwana a re jaanong o mo fetola sefane ntle le tumelano ya gagwe le Mmaagwe.

• Le go dula Ngwana jaanong o na le tetla ya go dula gongwe le gongwe mo malapeng a mabedi a, e le la khiba le le kgomo, fela go ya ka tumelamno.

BAETLEETSI

• Rre Pitso Senwedi kwa Ditshilong (Taung).
• Kgosi Motlhabane wa morafe wa gaMaidi kwa Pitsong (Taung).