I-Women for Change, inhlangano lengenti inzuzo levikela emalungelo emtsetfosisekelo alabasikati nebantfwana eNingizimu Afrika, yente umbhikisho wavelonkhe ngaLesihlanu, 21 Lweti, icela Mengameli Cyril Ramaphosa kutsi amemetele budlova lobucondziswe kubantfu labasikati nebantfwana njengenkinga yavelonkhe njengobe baholi bemhlaba bahlangene emhlanganweni we-G20 eNingizimu Afrika.
Lombikisho longenaludlame, wabitwa ngekutsi i-G20 Women’s Shatdown, bahlanganyeli bacelwa eNingizimu Afrika yonkhe balala phasi bathula imizuzu lengemashumi nesihlanu nga 12:00 kwentela kuhlonipha labasikati laba-15 lababulawa onkhe emalanga kulelive; sibalo lesihlatimulisa umtimba lesente iNingizimu Afrika yaba yincenye yetindzawo letinebungoti lobukhulu emhlabeni kubomake.
Lababamba indzima kulombhikiso bakhutsatwa kutsi bagcoke letimnyama kute balile timphilo letilahlekile ngenca yeludlame lolucondziswe kubantfu bebulili kanye nekubulawa kwebantfu besifazane, bese bagcoke letibukhwebeletane kute bakhombise kuvelana. Lomkhankhaso wasakatwa bukhoma etinkhundleni tekuchumana te-Women for Change, lapho emabito alabo labahlukunyetiwe afundvwa khona ngesikhatsi sekuthula kwemizuzu lelishumi nesihlanu.
Sikhatsi selombikiso saketfwa ngalokukhulu kucophelela, ngobe sihlangene nesemhlangano we-G20 kwentela kukhombisa umhlaba wonkhe ngekukhatsateka kweNingizimu Afrika ngekuhlukunyetwa kwebantfu bebulili. Lesento sihlose kufaka ingcidezi kuhulumende kutsi aphatse i-GBV njengenkinga lephutfumako yavelonkhe.
Lobikako ngu Phindile Zamani Mahlalela
