Phindile Mahlalela
Sekuphindze kwacopheka umlandvo elulwimi lweSiswati ngekwemukelwa kweSilulu SeSiswati kanye neBhodi yebacondzisi lesandza kukhetfwa letawubuka kusebenta kwaleyuthi yeSiswati. Imiswe ngalokusemtsetfweni emcimbini lobewubanjelwe eNyuvesi yaseMpumalanga mhlatinge-27 Inkhwenkhweti 2026. Lomcimbi waphawula sigaba lesibalulekile ekutfutfukisweni nasekugcinweni kwelulwimi kanye nemasiko eSiswati etindzaweni temfundvo kanye nemiphakatsi.
Emavi akhe ekuvula, ummeleli weNyuvesi yaseMpumalanga wagcizelela kutibophetela kwalesikhungo ekusekeleni tilwimi tendzabuko kanye nekutfutfukisa kuphumelela kutemfundvo. Wagcizelela kutsi Silulu SeSiswati NLU sibamba indzima lebalulekile ekucinisekiseni kutsi Siswati siyachubeka nekutfutfuka ekufundzeni nasetindzabeni temphilo yamalanga onkhe.
UMnu. JJ Dantile ihloko yetilwimi e-PanSALB, Dkt, S Maepa ngibo lebente inchubo yekungenisa libhodi lelisha ngekwendlala kabanti kusebenta kweBacondzisi bemayunithi ekwakhiwa kwetichazamagama, kantsi baphindze baveta indlela lekutawutselelana ngayo emanti emakhatsini weNyuvesi, i-PanSALB kanye neSilulu SeSiswati.
Emalunga lamasha lakhetsiwe ebhodi aveta kubonga kwawo ngelitfuba lekusebenta futsi atsembisa kusebenta ngekubambisana kute acinise lubumbano nekutfutfuka kweSilulu SeSiswati NLU. Lilunga lebelisandza kukhetfwa lakhuluma egameni lebhodi, lakhuluma ngetintfo letibalulekile, letifaka ekhatsi kukhuliswa kwelucwaningo lwetichazamagama tesiSwati, kukhutsata kutibandzakanya kwebafundzi, kanye nekwakha budlelwano netikhungo temasiko esifundzeni sonkhe.
Lomcimbi bewuhanjelwe tati temfundvo lephakeme, Solwati T Meyiwa umphatsi lomkhulu weNyuvesi, Solwati Maselesele umphatsi wetemfundvo kanye naDkt. Madiope umcondzisi weNyuvesi, Umphatsi welihhovisi le-PanSALB eMpumalanga UMnu. L Ndlovu, baholi bemasiko, bafundzi, kanye netivakashi lebetimenyiwe lebetitewubona kubekwa kwalelibhodi lelisha. Kulomcimbi bekuchichima injabulo kepha inenjongo, bekukukhombisa kubaluleka kweSilulu SeSiswati NLU njengeyunithi lemiselwe kutfutfukisa kubhalwa nekuhlelwa kwetichazamagama teSiswati, kutfutfukiswa kwelulwimi kanye nemagugu emasiko.
Kulomcimbi kwaphindze kwaba nekushintjana kwetipho emkhatsini kwebaphatsi bePanSALB kanye nebe Nyuvesi yaseMpumalanga njengendlela yekukhombisa budlelwane lobuhle emkhatsini kwaletikhungo letimbili. Bantfu lebebakhona bahalalisela lesento, baphawula ngekubaluleka kwaso ekulondvoloteni budlelwane lobuhle nekutfutfukiswa kwelulwimi lweSiswati kanye nekugcina emasiko.
Silulu SeSiswati NLU sekusikhatsi lesidze sibonwa njengemtimba lobalulekile ekutfutfukiseni lulwimi kanye netinchazamagama tesiSiswati. Kubekwa kwebhodi lensha kulindzeleke kutsi kuletse emandla lamasha kanye neticondziso letikahle emsebenti walesikhungo.
Lomcimbi waphetsa ngekubonga kanye nesicelo sekuchubeka nekusekelwa ngulabo labatsintsekako, njengobe lelibhodi lelisha licala sikhatsi salo ngembono locondzile wekukhula kanye nekutfutfukiswa kwelulwimi lweSiswati.
Injongo yeSilulu SeSiswati kucinisekisa kutsi lulwimi kanye netinchazamagama teSiswati tiyalondvolotwa, tikhuliswe, futsi tendluliselwe etitukulwaneni letitako.
