Litiko Lemasiko, Imidlalo nekukhibika lisemkhankhasweni wekutfutfukisa tilwimi letibonakala tisalela emuva esifundzeni seMpumalanga, lokufaka ekhatsi Siswati NesiNdebele. Lelitiko liba nemncintiswano wekubhala lowentiwa minyaka yonkhe, locale emnyakeni we-2021. Mhlatinge-20 Lweti 2025 lelitiko belibambe umcimbi wekuklomelisa babhali labahlabene emncintiswaneni wemnyaka we-2025, bewubanjelwe eNdalo Lodge khona eMbombela.
Lokuyindlela yekutfutfukisa letilwimi. Lomcimbi bewuhanjelwe ngulabadzala nalabasha, tati taletilwimi, lokufaka ekhatsi babhali, netimbongi, tikhungo temfundvo lephakeme kanye netinhlangano letahlukene letitfutfukisa tilwimi temdzabu njenge Libhodi Lelengamele Tilwimi Velonke iPanSALB. Kutihambeli talomcimbi bekukhona ngisho nasodolobha wamasipala weMbombela. Kuye kwagcugcutelwa babhali labasasebasha kutsi balondvolote letilwimi letibonakala tidvonsa matima ekutfutfukeni, baphindze batisebentise ngendlela lefanele. Kugcugcutelwe nabothishela kutsi ababambe lichaza ekutfutfukiseni letilwimi.
Elwimini lweSiswati kuphumelele: JJ Nkosi, NV Khoza na Zitha kantsi elwimini lweSindebele kwaphumelela Mohlamme, D, Mahlangu N, kanye na Mthombeni S Lababhali labahlabene batjelwe kutsi lokuphumelela kungumhlahlandlela, njengobe sebabona kutsi banelikhono lekubhala, abachubeke bangabuyeli emuva. Kutsi labo labangakaphumeleli loku akusho kuphela kwemhlaba ngobe netingalo atingeni tonkhe emlonyeni uma kudliwa.
Lobikako ngu Phindlile Mahlalela
