I-SWiP ngokubambisana ne-Yunivesithi yeMpumalanga ngeKhamphasini yeSiyabuswa, ibambe isifundobandulo se-Wikipedia esithethe amalanga amabili. Abafundi bafundiswe nge-Wikipedia nokobana isebenza njani, godu babandulwe ukuhlela, ukutjhugulula umtlolondaba osele ukhona ku-Wikipedia nokufaka umtlolondaba omutjha ku-Wikipedia.
Umnqopho wesifundobandulo bekukuhlomisa abafundi beYunivesithi yeMpumalanga ukufaka imitlolondaba ku-Wikipedia etlolwe ngamalimi wabo, ngomnqopho wokuthuthukisa nokubulunga amalimi wendabuko begodu nokuwavikela bona angatjhabalali ekukhambeni kwesikhathi.
UPhrofesa Eureka Jansen Van Vurren, omdosiphambili wamahlelo emkhakheni wezeFundo eYunivesithi yeMpumalanga, ngekhamphasini yeSiyabuswa, wamukela woke umuntu obekathamele isifundobandulo wagandelela ukuqakatheka kokubandulwa nokudluliswa kwamakghono watjho nokobana ukubandulwa ngenye yeendlela zokungezelela ilwazi ngamalimi wendabuko. Wabawa bona abazibandakanyako balinge ngamandla bona badlulisele amakghono nelwazi ebazolifumana kusifundobandulo se-SWiP.
Umsebenzi ngelimi lesiNdebele e-PanSALB, uMm. Emely Mahlangu wahlathululela abafundi ngendima edlalwa yi-PanSALB ephrojekthini ye-SWiP watjho nokobana lokhu kufaka hlangana ukuthuthukiswa nokusetjenziswa kwamalimi wendabuko eenkundleni zokuthintana ezifana ne-Wikipedia, wahlathulula ngokuqakatheka kokusetjenziswa kwemiThetho yokuTlola nokuPedela lokha abafundi nabatlola imitlolondaba, watjho nokobana iyatholakala kunzinzolwazi le-PanSALB.
UNom. Dumisani Ndubane ebekamkghonakalisi wesifundobandulo wahlathulula bona banikela ngelwazi simahla nge-Wikipedia begodu bathuthukisa ukujameleka kwamalimi woke weSewula Afrika ku-Wikipedia. Ngelanga lokuthoma uNom. Ndubane wahlathulu umlando we-Wikipedia, iinsika ezihlanu ze-Wikipedia namaphrojekthi wayo. Wahlathulula nangetuthuko esele ikhona solo kwathoma iimfundobandulo bewathokoza abasebenzisi belimi lesiNdebele ngokuthuthukisa inani lemitlolondaba nokuzibandakanya.
Ngelanga lesibili uNom. Ndubane wabandula ngokulungisa umtlolondaba, ukutjhugulula nokutlola umtlolondaba. Waraga wahlathulula bona zifakwa njani iinthombe, ukumadanisa imitlolondaba ekhuluma ngento yinye nokufaka imithombolwazi emitlolweniindaba emitjha.
I-SADiLaR yatlomelisa labo abatlole imitlolondaba eminengi. Abafundi batjengisa ukusithabela isifundobandulo bebathokoza nethuba ebanikelwe lona bona bazibandakanye kezokuthintana, ngomnqopho wokuthuthukisa nokubulunga ukusetjenziswa kwamalimi weSewula Afrika.
UMm. Nomsa Skosana we-SADiLaR wathokoza iYunivesithi ngokuvula iminyango nangokuzinikela ekuthuthukiseni amalimi, wathokoza i-PanSALB ngokuthamela isifundobandulo beyihlathulule ngokuqakatheka kokusetjenziswa nokulandela imiThetho yokuTlola nokuPeledwa kwamalimi, waraga wathokoza i-Wikipemedia nabafundi abakhambele isifundobandulo bewabawa bona abafundi baragele phambili batlole bathuthukise imitlolondaba ku-Wikipedia begodu babandule bebakhuthaze nabanye abafundi.
