Hi Nsuku Pius Mtileni
Huvo yo Angarhela ya Tindzimi ta Afrika-Dzonga (HATAD), xisimekiwa lexi byarhisiweke vutihlamuleri bya ku tlakusa na ku sirhelela ndzhaka leyi fuweke ya tindzimi ta Afrika-Dzonga hi ku landza Nawu wa HATAD, Nawu 59 wa 1995 lowu antswisiweke, yi ya emahlweni yi teka vunhenha eka ku tlakusa timfanelo ta ririmi eka miganga ya Afrika-Dzonga.
Tanihi xiphemu xa Makungu ma Matirhelo ma lembeximali ra 2024/25, HATAD yi simekile mapfhumba lama kongomaneke na Timfanelo ta Munhu ta Ririmi eka swifundzakulu swo hambanahambana swa tiko. Xikongomelokulu xa mapfhumba lama i ku lemukisa vaakatiko va Afrika-Dzonga hi timfanelo ta vona ta ririmi leti humaka eka vumbiwa bya tiko, ku paluxa tindlela ta ku kandziyeriwa ka timfanelo ta vanhu ta ririmi na ku nyika tindlela leti vanhu va nga nghenisaka ha tona swivilelo swa swihehlo swa ku kandziyeriwa ka timfanelo ta vanhu ta ririmi. Hofisi ya xifundzakulu xa Limpopo yi vile na pfhumba leri hi siku ra 24 Hukuri 2025 ehodela ya Royal ePolokwane.
Pfhumba leri ri hlanganisile varhangeri va ndhavuko endhawini yin’we kusuka eka swifundzatsongo swa Limpopo, ku nga Capricorn, Mopani, Sekhukhune, Vhembe na Waterberg, ri karhi ri tekela enhlokweni xiphemu lexi va xi tlangaka eka ku hlayisa tindzimi emigangeni yo hambanahambana. Hofisi ya HATAD ya xifundzakulu xa Limpopo yi tirhile kun’we na Khomixini ya Ndzingano wa Rimbewu, Hofisi ya Musirheleri wa Vaaki na Komiti ya Tindzimi ta Xifundzakulu ya Limpopo ku vonisisa leswaku vanghenelapfhumba va kuma vuxokoxoko byo enta kusuka eka swisimekiwa leswi seketelaka xidimokirasi eLimpopo.
HATAD yi andlarile rimba ra vumbiwa eka timfanelo ta munhu ta ririmi, yi yile emahlweni yi boxa leswaku nawu na/kumbe pholisi yin’wana na yin’wana ya ririmi leyi vulaka leswi lwisanaka na leswi Vumbiwa byi vulaka swona yi tekiwa yi nga ri enawini. HATAD yi yile emahlweni yi kombisa tindlela leti timfanelo ta munhu ta ririmi ti khumbaka ha kona xindzhuti xa munhu na ku hlayisa ndhavuko, leswi endlaka leswaku ku hlayisa timfanelo leti ku va ka nkoka eka ku teka xiave eka xidimokirasi. Swin’wana swa nkoka leswi Huvo yi swi boxeke hi leswaku loko munhu a nga tivi timfanelo ta yena ta ririmi, a nge swi tivi na loko ti ri ku kandziyeriweni.
Huvo yi kombisile leswaku munhu a nga nghenisa swivilelo swa swihehlo swa ku kandziyeriwa ka timfanelo ta munhu ta ririmi hi imeyili eka lhr@pansalb.org kumbe hi riqingho eka 015 291 5888 kumbe hi ku endzela webusayiti ya www.pansalb.org kumbe hi ku endzela hofisi ya HATAD ya xifundzakulu eka nomboro ya 29 Hans Van Ransburg edorobeni ra Polokwane.
Xiyenge xa swivutiso na tinhlamulo lexi veke kona xi nyikile vanghenelapfhumba nkarhi wa ku nyika miehleketo ya vona, ku vutisa swivutiso na ku avelana leswi va hlanganaka na swona eka vutomi bya masiku hinkwawo, na ku tihlanganisa na swisimekiwa leswi tirhanaka na timfanelo ta vanhu. Varhangeri lava a va ri kona va bumabumerile leswaku mapfhumba ya muxaka lowu ya fanele ku endleriwa tihosi hinkwato na vaakatiko hi laha swi kotekaka ka kona.
