Hi lembe ra 2019, Huvo ya Rixaka ya Ririmi ra Xitsonga (HURIRIXI) yi pfuxetile Milawu ya Matsalelo na Mapeletelo ya ririmi ra Xitsonga, leyi na namunthla ka ha tirhaka yona. Tanihi yin’wana ya matshalatshala ya Huvo yo Angarhela ya Tindzimi ta Afrika-Dzonga (HATAD) ya ku yisa ndzingananiso wa ririmi eka vanhu, Tihuvo ta Rixaka ta Tindzimi ti fanele ku endla Miletelavutivi ya Milawu ya Matsalelo na Mapeletelo ya tindzimi hi ku landza Kungu ra Matirhelo ra HATAD ra Lembeximali ra 2025/26.
Hi siku ra 13 Nyenyakulu 2026, HURIRIXI yi vile na ndzetelavutivi wa milawu leyi eYunivhesiti ya Venda. Ndzetelavutivi lowu wu ngheneriwile hi vatirhi va Huvo yo Endla Milawu ya Xifundzakulu xa Limpopo, vatirhi va Ndzawulo ya Vululami na Nhluvukiso wa Vumbiwa, Vatsundzuxi va dyondzo ya Xitsonga eka Ndzawulo ya Dyondzo ya Masungulo, Valeteri na Swichudeni swa ririmi ra Xitsonga eYunivhesiti ya Venda.
Mnn Joyce Madiba, loyi ku nga Mulawurinkulu wa hofisi ya Xifundzakulu xa Limpopo ya HATAD, u nyikile andlalo wa leswaku HATAD i yini, xileriso xa nawu yi xi kuma kwihi naswona migingiriko ya yona hi yihi. U boxile leswaku HATAD yi kuma xileriso xa yona kusuka eka Vumbiwa bya tiko ra Afrika-Dzonga eka ndzimana ya 1, xiyenge xa 6 na le ka nawu wa HATAD, Nawu 59 wa lembe ra 1995 lowu antswisiweke. U yile emahlweni a hlamusela migingiriko ya HATAD na swisimekiwa leswi yi swi tirhisaka ku fikelela migingiriko ya yona, ku katsa Tiyuniti ta Rixaka ta Lekisikhogirafi, Tikomiti ta Ririmi ta Swifundza na Tihuvo ta Rixaka ra Tindzimi, ku katsa HURIRIXI. U nyikile xikombiso xa HURIRIXI leyi nga na ntirho wa ku ringananisa ririmi ra Xitsonga hi ku endla milawu ya matsalelo na mapeletelo ya rona eka yin’wana ya migingiriko ya yona.
Phrf Arnold Mushwana, Mutshamaxitulu wa HURIRIXI, u nyikile andlalo wa milawu leyi laha a vulavuleke ehansi ka tinhlokomhaka leti landzelaka: Swiaki swa marito, Mitlawa ya maviti, Mavitimpfelelo yo huma eka maendli, Xitwari xa le makumu eka maviti, Xitwari xa le makumu eka ntsongohato, Rihlawuri, Nandzulo, Maengeterimpfelelo, na Vundhawu.
Dkd Hlengiwe Mashele, Muhlerinkulu wa Yuniti ya Rixaka ya Lekisikhogirafi ya Xitsonga, u nyikile andlalo wa yena laha a vulavuleke ehansi ka tinhlokomhaka leti landzelaka: Mahikahatelo (xoboho), Maritonkatsano, Masiku ya vhiki, Tin’hweti ta lembe, Malombiwa, Makomiselo, na Peletwana rintshwa eka Xitsonga.
