Manweledzo a mushumo wa u vula Nnḓu ya mahosi na Vhurangaphanḓa ha Vha Khoi-San lwa tshiofisi vunduni ḽa Limpopo
Vha Nnḓu ya mahosi na Vhurangaphanḓa ha Vha Khoi-San vho fara mushumo wa u vula Nnḓu ya Vhuhosi na Vhurangaphanḓa ha Vha Khoi-San lwa tshiofisi vunduni ḽa Limpopo, kha ṅwaha wa muvhalelano wa 2025/26 nga ḽa 29 Shundunthule 2025 ngei kha Khoro ya Nnḓu ya Vhuhosi ha Thengwe, Tshiṱirikini tsha Vhembe. Mutshimbidzamushumo ho vha hu Mudzulaphanḓa wa Nnḓu ya Vhuhosini na Vhurangaphanḓa ha Vha Khoi-San Vunduni ḽa Limpopo, Vho Hosi Pheni Ngove. Kha vho dzhenelaho mushumo uyu hu katelwa na Mulangavundu wa Limpopo Dokotela Vho Phophi Ramathuba, mahosi u bva kha mavundu o fhambanaho, Mirado ya khorotshitumbe(MEC) vho hweswaho vhudifhinduleli ha mihasho yo fhambanaho na miraḓo ya lushaka. Mushumo uyu wo sumbedzisa ndeme ya mvelele kha muvhuso wa zwino na u pembelela mvelele nga vhuphara na vhufa.
U vula na u ṱanganedza
Mushumo uyu u sa athu thoma, mudzulaphanḓa vho mbo ḓi humbela tshikhala tsha u ri vhathu vha thome vha kwatamise zwifhaṱuwo hu u itela u elelwa u ri sia fhano shangoni ha ḽizhakanḓila mulwela mbofholowo Dokotela Vho Tshenuwani Farisani vhe vha ri sia nga maḓautsha a iḽo ḓuvha. Hosi Ngove vho mbo ḓi ṱanganedza vhathu vhoṱhe vho dzhenelaho uyo mushumo, he vha topola na mahosi a maṅwe mavundu hu tshi katelwa Khosi ya Mufumukadzi Vho Queen Masalanabo Modjadji vhane vha vha vhone Khosi ya Mufumakadzi muṱukusa nga miṅwaha kha dzhango ḽa Afrika.
Mulaedza nga Mulangavundu wa Limpopo Dokotela Vho Phophi Ramathuba
Musi Mulangavundu wa Limpopo vha sa athu ima luvhanḓeni vho rangwa nga u ṱanganedzwa nga tshikona na murendi we a vha renda u swika vha tshi ima luvhanḓeni. Kha mulaedza wavho wa ḓuvha vho ambesa nga u dzhiela nṱha maitele a mvelele na u ri vhathu vha so ngo laṱa aya maitele. Vho amba na nga khaedu dzine vhadzulapo vha vhupo ha mahayani vha khou ṱangana nadzo vha humbela vharangaphanḓa vha zwiimiswa na mihasho u ri vha ṱhogomelese vhupo ha mahayani, nga maanḓa musi vha tshi ita mafulo vha itese kha thungo dza mahayani hu u itela u ri na vhadzulapo vha mahayani vha vhe na luvhonela, nahone na zwililo zwavho zwi ṱavhanye zwi pfhiwe. Vho dovha vha renda na shango ḽa Thengwe he vha ri ḽi na ḓivhazwakale ya u zwima dzinngwe ndi nga zwo vha tshi ambara na mikumba ya hone u sumbedza vhuhaga.
Vho topola zwi tevhelaho sa zwithu zwa ndeme zwine zwa tea u ṱhogomeliwa:
- Miri ya tshirema: he vha ri i tea u ṱhogomeliwa sa vhunga i yone dzilafho, vha ṋea na tsumbo nga muri une wa pfhi muṱavhatsindi, he vha amba u ri musalauḽa vhathu vho vha vha tshi ri u lwala vha lafhiwa nga miri ya tshirema vha fhola, fhedzi vhathu vha musalauno vha vho sokou pfha u nga mishonga ya tshirema a si ya vhukuma.
- Vho amba na nga u ṱhonifha maitele a tshirema sa izwi ri tshi khou dzhena kha khalaṅwaha ya u imisa mirundu. Fhedzi vha ita khumbela kha mahosi ane a ḓo vha o imisa miḽa kana mirundu u ri maitele ayo a so ngo khakhisa vhagudiswa kha pfhunzo dzavho. Vho ita na khuwelelo ya uri vhoṱhe vhane vha ḓo imisa miḽa vha tevhedze maga oṱhe a mulayo na mutakalo hu si vhe na u lozwa matshilo a vhana musi vhe miḽani. Vha ombedzela ḽa uri hu na misanda i so ngo tendelwaho u imisa miḽa, zwo ralo, vha khou humbela u ri hu songo vha na u imisa miḽa zwi siho mulayoni.
- Vho ita na khumbelo ya u ri musi misanda vha tshi ṋetshedza vhathu mavu kana u tshetshela vhathu zwitentsi, vha khou humbelwa u tshetshela vhathu zwitentsi vhane vha vha na mabambiri a tshidzulapo nahone vha lavhelese arali vha si vhathu vha zwiito zwa vhugevhenga.
- Vho ita na khumbelo ya u ri mahosi vha shumisane na vhaofisiri vha tsireledzeledzo hu u itela u tsireledza vhadzulapo.
- Vho fhedza nga u sumbedza u ri khumbelo dzo itwaho nga mahosi dzi ḓo swika dzine dza vha ṱhingo na mimoḓoro, he vha ri fhedzi a zwi nga swiki nga khathihi zwi ḓo tou sielisana, honeha, u swika zwi ḓo swika hu u itela uri vha kone u isa tshumelo vhathuni.
Vho fhedza nga u ṱuṱuwedza vhuthihi vhukati ha mahosi na vhadzulapo, vha ri lushaka ri tea u ḓihudza nga vhuvha hashu sa vhunga Afrika ḽo pfhuma vhukuma nga mvelele.
