Tendani Tshikombedze
Manweledzo a Fulo ḽa Pfhanelo dza u shumisa Luambo lwau.
Vha ofisi ya Bodonyangaredzi ya Nyambo ya Afurika Tshipembe (PanSALB) vunduni ḽa Limpopo vho vha na mushumo wa fulo ḽa u pfhumbudza nga ha Pfhanelo dza Luambo lwa Vhathu. Mushumo uyo wo farwa nga ḽa 11 Fulwi 2026 kha ḽa Tshiozwi, Ha Sithumule. Mutshimbidzamushumo ho vha hu Mudzulaphanḓa wa Khoro ya Vhuhosi ha ha Sinthumule. Mushumo uyu wo dzhenelwa nga misanda ya mivhundu ya fumimbili (12), zwiimiswa zwa kereke na vhaṅwe vhadzulapo vha mivhundu yo fhambanaho, hu tshi katelwa na vhashumi vha ha masipala.
U vula na u ṱanganedza
Mushumo uyu u sa athu thoma, mudzulaphanḓa vho mbo ḓo humbela tshikhala tsha u ri vhathu vha thome vha kwatamise zwifhaṱuwo ha vulwa mushumo nga thabelo. Vha Khoro ya Vhuhosi ha ha Sinthumule vho mbo ḓi ṱanganedza vhathu vhoṱhe vho dzhenelaho uyo mushumo, mushumo wa bvela phanḓa.
Tshipikwa tsha ḓuvha nga Vho Joyce Madiba
Vho Joyce Madiba vhane vha vha Mulanguli wa PanSALB vunduni ḽaLimpopo, vha tshi khou ḓologelwa nga Tendani Tshikombedze vho amba nga ha tshipikwa tsha ḓuvha he vhari, tshipikwa tshihulwane ndi u fhaṱusa lushaka nga ha pfhanelo dza luambo lwa vhathu na nga u kandekwanya ha pfhanelo dza luambo lwa vhathu.Vho amba na nga uri PanSALB yo hweswa maanḓa nga Ndayotewa ya Afrika Tshipembe hune kha Khethekanyo ya 6 (5) ya Ndayotewa i sumbedza uri PanSALB i tea u alusa na u bveledza nyambo dzoṱhe dza tshiofisi, hu tshi katelwa na nyambo dza Khoi, Nama na San na dziṅwe nyambo dzine dza ambiwa fhano Afrika Tshipembe.
Vho Joyce vho amba na nga zwiimiswa zwiraru zwine zwa thusa PanSALB u alusa, u vhulunga na u takula nyambo dza Vharema, he vha ri tshiimiswa tsha u thoma ndi Khoro ya Lushaka ya Luambo ya Tshivenḓa ine miṅwe ya mishumo yayo ndi u bveledza na u alusa nyambo dza tshiofisi, ha vha na tshiimiswa tsha vhuvhili tshine ndi Yunithi ya Lushaka ya Ḽekisikhogirafi ine mushumo wayo ndi u ṅwala na u bveledza Ṱhalusamaipfhi, tshiimiswa tsha vhuraru ndi Komiti ya Luambo ya Vundu, lune huna idzo komiti dza ṱahe u ya nga mavundu a Afurika Tshipembe ine mushumo wayo ndi u bveledza na u takula nyambo dza tshiofisi dza vundu ḽenelo, he vhari nyambo dza vundu ḽa Limpopo ndi Sesotho sa Leboa,Tshivenḓa, Xitsonga, isiNdebele, English, Afrikaans and South African Sign Language.
Vho dovha hafhu vha amba na nga Mulayotibe wa Pfhanelo dza Vhathu he vhari uyo Mulayotibe u na milayo minzhi lune hu katelwa na Khethekanyo ya vhu 30 ine ya sumbedza uri, muṅwe na muṅwe u na pfhanelo ya u shumisa luambo na u shela mulenzhe kha vhutshilo ha mvelele nga luambo lune a funa. Vha ṱahisa na ḽa uri vhathu vha na pfhanelo dza u sengelwa kana u ḓologelwa kha milandu nga nyambo dza ḓamuni musi vhe khothoni, hu u itela uri hu si vhe na u hweswa mulandu zwi songo tea kana u rulwa mulandu zwi songo tea zwo bva kha uri ho vha na u sa pfhesesana nga nyambo.
Nḓila dza u vhiga mbilahelo nga Vho Tshikombedze
Vho Tshikombedze vho amba nga ha maga ane a tevhelwa musi hu tshi itwa mbilahelo nga ha u kandekanywa ha pfhanelo dza luambo. He vhari Bodonyangaredzi ya Nyambo ya Afrika Tshipembe sa zwe ya hweswa maanḓa nga Mulayo wa PanSALB wa vhu 59 wa ṅwaha wa 1995 u ya nga he wa shandukiswa, i ita ṱhoḓisiso nga ha u kandekanywa ha pfhanelo dza luambo, mbekanyamaitele ya luambo kana maitele a luambo. Vho ṱalutshedza na nga ha uri ndi nnyi ane a tea u vhiga mbilahelo nga ha u kandeledzwa ha pfhanelo dza vhathu dza luambo, vha sumbedza uri ndi muthu muṅwe na muṅwe o ḓiimisaho nga eṱhe kana a tshi khou vhiga o imela muṅwe muthu, zwiimiswa zwa mulayo, tshiimiswa tshiṅwe na tshiṅwe tsho imela miraḓo yatsho, miraḓo ya tshigwada tsha luambo na tshiimiswa tshiṅwe na tshiṅwe tsha muvhuso. Vho engedza nga u vhudza vhathu uri vha nga vhiga mbilahelo nga u rumela imeiḽi kha Lhr@pansalb.org, nga kha lubuvhisia www.pansalb.org, nga u ya ofisini lune ofisi khulwane i kha ḓiresi ya 523 Stanza Bopape Street, Provisus Building Pretoria kana ofisini dza Vundu dza PanSALB he vhari yavho ofisi i wanala Polokwane kha ḓiresi ya 29 Hans Van Rensburg nomboro ya luṱingo ndi 015 291 5888.
Mbudziso, Mihumbulo na Phindulo
Ho vha na mbudziso ya uri vha PanSALB vha ri mini nga ha musi luambo lwa shango ḽa China lune lwa vha Mandarian lu tshi khou vha tshipiḓa tsha pfhunzo nga maanḓa mahayani hune a hu na muthu ane a shumisa ulwo luambo.
Ho vha na khumbelo ya uri vha PanSALB vha dovhe vha vhuye kha uvho vhupo sa izwi vhathu vha tshi khou pfha zwe zwa vha zwi tshi khou ambiwa zwi zwa ndeme nahone vhunzhi ha vhathu a vha na nḓivho ya uri huna tshiimiswa tshine tsha lwela pfhanelo dza u shumisa luambo lwau iwe mune.
Ndivhuho na u vala
Vha Khoro ya vhupo ha ha Sinthumule vho sumbedza u hulisea nga u itelwa fulo iḽi vha ambedzela uri mushumo uyu u songo guma hanefha uye phanḓa.
